EDITORYAL - Hanapin, nawawalang sabungeros
HINDI pa natatagpuan ang 31 sabungeros. May nagsabi na baka patay na ang mga ito. May nagsasabing itinatago lamang ang mga sabungeros. Sabi ng Criminal Investigation and Detection Group (CIDG), 15 suspects na ang sinampahan nila ng kaso dahil sa pagkawala ng mga sabungeros. Ayon sa CIDG, kabilang sa mga kinasuhan ay mga security personnel ng Manila Arena na nagtulung-tulong para maisakay sa gray van ang mga sabungeros. Nakunan ng CCTV ang pagpasok at paglabas ng van sa nasabing sabungan sa Sta. Ana, Manila. Sinampahan ng kidnapping at serious illegal detention ang mga suspects. Ang pagsasampa ng kaso ay kinumpirma naman ng Department of Justice (DOJ).
Mabagal ang paghahanap sa mga nawawalang sabungeros. Umiiyak na ang mga kaanak ng biktima subalit walang makapagturo kung nasaan na ang mga sabungeros na kinidnap umano sa iba’t ibang lugar sa bansa. Isa sa mga biktima ang nakapag-text pa umano sa ama nito bago kinidnap sa Manila Arena. Mula noon, hindi na nakita ang sabungero.
Nang magsalita si President Duterte sa kanyang pagbisita sa Palo, Leyte noong Biyernes, sinabi niyang posibleng patay na ang mga sabungeros. Ayon sa presidente, may sindikato umano sa sabungan. Sinabi pa ng presidente na maaaring nananabotahe ng laban ang mga nawawalang sabungeros. Mayroon umanong ginagawa sa mga panabong para manghina at matalo sa laban. Posibleng nahuli ng sindikato ang ginagawa ng mga sabungeros kaya nalagay sa peligro ang buhay ng mga ito.
Kung may hinala nang ganito, nararapat ipag-utos ang imbestigasyon sa mga nasa likod ng pagdukot. Alamin ng PNP ang mga sindikato sa sabungan at kalkalin lahat para malaman ang katotohanan. Hindi dapat magsawalang-kibo sa mga nawawalang sabungeros.
Pakilusin naman sana ng presidente ang kamay ng batas para malaman kung ano ang nangyari sa mga nawalang sabungeros. Nakakaawa ang kalagayan ng kanilang mga kaanak na naghihintay.
- Latest