Karampatang parusa!
Kung ang pamilya ng mag-inang sina Sonya at Frank Anthony Gregorio na binaril ng dating pulis na si Jonel Nuezca ay labis ang kasiyahan sa natamong maagang hustisya, iba naman ang nadarama ngayon ng pamilya ng 18-anyos na si Erwin Arnigo na may autism spectrum disorder na binaril din ng isang parak matapos ang isinagawang raid sa isang tupadahan sa Caloocan City kamakailan.
Hindi pa sa korte ang desisyon na kanilang ikinadidismaya, kundi ang lumabas na desisyon na inirekomenda ng Internal Affairs Service (IAS) ng Philippine National Police (PNP).
Hindi umano nakakasapat ang naging desisyon laban sa sangkot na pulis.
Pinapatawan kasi ng IAS ng parusang 40 araw ng suspensyon ang Senior Master Sergeant Christopher Salcedo, isa sa apat na pulis na sinasabing sangkot sa pagbaril at pagkapatay kay Erwin.
Sa bersyon ng pulis, nakipag-agawan umano ng baril ang biktima nang maganap ang pangyayari na iba naman sa bersyon ng ilang testigo at ng pamily a Arnigo.
Dapat daw ay 60 -araw ang parusang suspension kay Salcedo, pero ibinaba ito sa 40 -araw dahil binigyang timbang ang nakuhang mga parangal ng parak.
Ayon sa pamilya ng nasawi, hindi dapat ganun dahil dapat din daw nabigyang pansin na isang special child ang biktima na walang kalaban-laban.
Hindi rin tanggap ni Helen, ina ng biktima sa pahayag ng IAS na ang pagkakamali lang ni Salcedo ay hindi ito naging maingat sa paghawak ng kanyang baril habang sinusubukang arestuhin ang biktima.
Nanawagan ang pamilya Arnigo kay PNP chief Gen. Guillermo Eleazar na masilip ang desisyon ditto ng IAS.
Aantabay tayo sa magiging development ng kaso, at sa ilalatag pang mga argumento ng magkabilang panig .
- Latest