2 piraso ng gintong nagkakahalaga ng $250,000, natagpuan ng gold hunters sa Australia

DALAWANG Australian gold hunters ang nakadiskubre ng dalawang malalaking tipak ng ginto na may pinagsamang timbang na 7.7 pounds at may tinatayang halaga na aabot $250,000 (katumbas ng P12.2 milyon).

Ayon sa magbayaw na sina Brent Shannon at Ethan West, na pawang mga tampok sa Australian TV show na Aussie Gold Hunters, ay natagpuan nila ang gold nuggets nitong nakaraang Huwebes sa Tarnagulla, Victoria na kilalang minahan ng ginto.

Ayon sa dalawa, ilang buwan din ang inabot bago sila nakakuha ng pahintulot upang maghanap ng ginto sa lugar.

Bagama’t dati pa silang nakakahanap ng maliliit na piraso ng ginto ay ngayon lang daw sila nakatagpo nang malalaking gold nuggets sa nabanggit na gold field.

Pambihira rin daw na sa loob lang ng isang araw nila natagpuan ang dalawang malalaking tipak ng ginto.

Ayon sa mga eksperto, maaring tumaas pa ng 30% ang tinatayang presyo ng dalawang piraso ng gold nuggets kung sa isang collector ito maipagbebenta.