Bgy. officials sa Pasay sangkot sa droga

FLASH Report: Habang nakatutok ang pulisya sa kaso ng Fallen SAF 44, nagbukas naman ng dalawang mesa na color games si alyas Adrian sa Lozada Market sa Las Piñas at walong lamesa naman ang kay Sonny Atienza sa Pulang Lupa, Bgy. Sto. Niño sa Pob­lacion Muntinlupa City. Bakit naglutangan ang pergalan sa southern Metro Manila sa panahon ni SPD director Chief Supt. Henry Rañola? Paging NCRPO chief Dir. Carmelo Valmoria Sir!

* * *

GINIGIBA ni alyas Borbie kay Pasay City Mayor Tony Calixto ang hepe ng pulisya na si Sr. Supt. Sidney Hernia. Sinabi ng mga kosa ko na si Borbie pala ang kumokolekta ng lingguhang intelihensiya sa mga pasugalan tulad ng racehorse bookies, EZ2, lotteng at iba pa sa mga gambling lords na nag-ooperate sa Pasay. Ang gamit ni Borbie ay si Bong Jose. Nais pala ni Borbie na gagawing suwelduhan na lang si Hernia na hindi naman pumayag kaya’t  ilang linggo nang tinabla ng huli ang mga pasugalan sa Pasay. Boom Panes! Kasi nga, kapag nag-utos ng malawakang raid si Hernia laban sa mga pasugalan, tiyak ang mapapahiya ay si Borbie, di ba mga kosa? Kaya hinihingi ni Borbie ang tulong ni Calixto para makumbinsi si Hernia na tanggapin na ang alok niyang suweldo sa mga pasugalan. Pag nagkataon, barya lang ang mapupunta kay Hernia at ang busog na busog sa grasya ay si Borbie, di ba mga kosa? T’yak ’yun! Kung sabagay, matagal nang ipinagmalaki ni Borbie na bagyo siya kay Calixto kaya sinubukan n’yang idaan dito ang problema n’ya kay Hernia. Hehehe! Magtatagumpay kaya si Borbie? Ano sa tingin n’yo mga kosa?

Kung sabagay, hindi lang pasugalan ang problema sa Pasay kundi maging ang droga. Sa talaan ng AIDSOTF, maraming barangay officials sa siyudad ni Calixto ang sangkot sa droga bilang big-time pusher o drug syndicate coddler. Kaya nga kaliwa’t kanan­ ang patayan sa Pasay at Makati dahil sa droga, di ba mga kosa?

Nabanggit na din lang natin ang Makati, ang umuusok bang balita sa siyudad ni Mayor Junjun Binay, ay nagpalit ng tong collector ang hepe ng pulisya na si Sr. Supt. Ernesto Barlam. Sinibak ang isang alyas Gardo at ang ipinalit ay si Satorre. Naliliitan kasi si Barlam sa tinatanggap niyang grasya mula sa pasugalan. Si Barlam mga kosa ay galing sa Maynila at sanay siya na mayroong parating sa vendors at iba pang gumagamit ng bangketa kaya malaki ang weekly payola n’ya, di ba Maj. Gonzales Sir? Hehehe! Pitsa-pitsa lang pala itong si Barlam, di ba mga kosa? Tumpak!

Sinabi ng mga kosa ko na sinamantala ni Barlam na abala si Mayor Binay sa mga moro-moro ng Senado sabay sibak niya kay Gardo. Sa pagkaalam ko kasi OIC lang si Barlam at bawal sa kanya ang mag-relieve ng mga tauhan at iba pang hakbangin maliban sa masuwelduhan nang maayos ang mga rank-and-file ng Makati police. Dapat kasi, status quo lang, di ba NCRPO chief Dir. Carmelo Valmoria Sir? Sa pagkaalam ng mga kosa ko, ginamit ni Barlam si Rañola para magawang legal ang pagkasibak kay Gardo. Sino kaya ang kumita? Hehehe! Pakisagot nga Gen. Rañola Sir?

Kung si Hernia ay umaayaw sa grasya, ito namang si Barlam ay gustong mapuno ng pitsa ang bulsa, di ba mga kosa? Abangan!