Sayang na sayang

Sayang at ang batas nitong ating bansa

sa panahong ito’y binabalewala;

Ang mga mapera’y nagwawalanghiya

umuupa sila nang taong masama!

Sayang at nagkalat sa mga lansangan

mga taong-hudas masama ang pakay;

Pinapatay nila’y mga kasamahan

sa hangad masunod hilig ng katawan!

Sayang at maraming namamatay ngayon

dahil nagkalat na ang mga simaron;

Sa lahat ng dako saanman paroon

tanging kamatayan siyang panginoon!

Sayang at wala nang bisa ang pag-ibig

ng puso sa puso kung may nilalangit;

Naghahari ngayon ay malubhang inggit

kaya buhay natin biglang napapatid!