PWD binoga ng kapitbahay sa Dasma

CAVITE, Philippines — Inoobserbahan sa pagamutan ang isang lalaking person with disability (PWD) matapos magtamo ng tama ng bala sa balikat mula sa nakaalitang kapitbahay sa Brgy. Luzviminda 1, Dasmariñas City, kama­kalawa ng gabi.

Kinilala ng pulisya ang biktima na si alyas “Biboy,” 35-anyos, resi­dente ng Brgy. Fatima 2, Dasmariñas City, Cavite.

Arestado naman ang suspek na kinilala sa alyas Poldo, 55-anyos, construction worker, residente din ng lugar.

Base sa ulat ng pulisya, alas-8:15 ng gabi nang maganap ang insidente, naglalakad pauwi ang biktima galing sa trabaho nito nang harangin ng suspek at barilin nang malapitan gamit ang isang maiksing baril.

Nakuha pang tumakas ng suspek na kalaunan ay naaresto rin ng pulisya.

Nagtamo ng tama ng bala sa balikat ang biktima at kasalukuyan nang inoobserbahan sa pagamutan.

Napag-alaman na may dati nang alitan sa pagitan ng dalawa.

Narekober sa lugar ng insidente ang isang cal .38 na revolver at apat na bala nito.