Busking program gitanyag sa siyudad sa Sugbo

CEBU, Philippines — Aduna na unyay lugar diin mahimong makapasundayag ang mga talentadong Sugbuanon sa Dakbayan sa Sugbo, diin dili na sila sayon nga masaypan o dakpon tungod sa pagtuo nga nanglimos lamang sila sa kadalanan.

Kini human ni-anunsyo si Cebu City Mayor Nestor Archival sa iyang Facebook nga nag-awhag sa tanang Sugbuanon nga adunay katakus sa pagkanta, pagsayaw, painting, spoken word, o bisan unsang performance art nga mosalmot sa Cebu City Busking Program, nga usa ka inisyatiba nga nagtumong sa pagpasiugda sa lokal nga pagkamamugnaon ug pagdala og kalingawan ngadto sa mga pampublikong lugar sa dakbayan.

Ang mapili nga mga partisipante makapasundayag sa pipila sa labing nailhang pampublikong lugar sa syudad sama sa Plaza Sugbo, Fuente Osmeña Circle, Plaza Independencia, Senior Citizens’ Park, ug Freedom Park. Ang mga pasundayag himuon matag adlaw gikan sa alas 5:00 sa hapon hangtod alas 7:00 sa gabii, aron mahatagan og higayon ang mga residente ug mga bisita sa dakbayan sa pagtan-aw ug pagtagamtam sa talento sa mga Sugboanon samtang naglingaw-lingaw sa mga pampublikong kalaagan.

Kabahin kini sa paningkamot sa kagamhanan sa paghatag og mas daghang oportunidad sa mga lokal nga artista pinaagi sa paghatag kanila og plataporma diin ilang mapadayag ang ilang pagkamamugnaon, makig-uban sa komunidad, ug makatampo sa mas buhi ug masanag nga kultura sa dakbayan. Naumol ang maong lakang human sa kasinatian sa usa ka 68-anyos nga harmonica player nga nagpatukar sa Colon Street apan gidakop niadtong Mayo 7, 2026 sa Cebu City Anti-Mendicancy Office tungod kay matud pa nagpakilimos kini samtang nga nagpatukar.

Hinoun wala pa ipahibawo kun kanus a magsugod ang pasundayag. — /MEL (BANAT NEWS)