COTABATO CITY – Isang tao ang sugatan matapos pasabugan ng granada ng dalawang ‘di kilalang suspek ang harapan ng isang bus terminal, kahapon ng madaling araw.
Ayon sa Cotabato City Police Office, ang sugatan sa naturang pagsabog ay si Mohammad Alim, 37-anyos, dispatcher ng mga pampasaherong jeepney at mga van na naghihintay ng mga pasahero ng mga unit ng Husky Bus na bumababa sa terminal nito sa gilid ng Sinsuat Avenue rito na ‘di kalayuan sa isang police checkpoint.
Ayon sa mga saksi, isa sa dalawang lalaking magkaangkas sa motorsiklo ang naghagis ng granada sa tapat ng Husky Bus terminal na nakatakas bago umalingawngaw ang malakas na pagsabog sa kapaligiran.
Nabatid na makailang ulit na ring binomba ng mga teroristang nangingikil ang ilang unit ng nasabing bus company upang mapilitang magbigay ng pera ang may-ari nito bukod sa tangkang pambobomba sa bus terminal nito.
Noong Abril 17, anim na pasahero ng isang double-decker Husky Bus ang sugatan sa pambobomba ng grupong Dawlah Islamiya at Bangsamoro Islamic Freedom Fighters habang nakaparada sa municipal terminal ng Isulan sa probinsya ng Sultan Kudarat.
Maagap naman na napigil ng mga bomb experts ng Cotabato City Police Office at ng 6th Infantry Division ng Philippine Army ang tangkang pagbomba, gamit ang tatlong improvised explosive devices, ng Husky Bus terminal noong May 31.