Telco engineer nadale ng ‘akyat-bahay’, 2 suspek huli
CAVITE, Philippines — Pinasok ng dalawang hinihinalang miyembro ng “Akyat-Bahay Gang” ang bahay ng isang engineer ng telecommunication (Telco) company at nilimas ang may P300,000 na halaga ng mga mamahaling kagamitan at gadgets nito kamakalawa ng hapon sa Brgy. Molino 3, Bacoor City.
Agad namang naaresto ang mga suspek sa isinagawang followup operation ng pulisya na nakilalang sina Jonas Raga, 19-anyos, at Leomar Dacame, 34, kapwa construction worker at taga-Bacoor City, Cavite.
Sa imbestigasyon ni P/Staff Sgt. Marvin Rae Calaor, alas-4 ng madaling araw ng pasukin ng mga suspek ang bahay ni Engr. Kurt Khennyvhin, 26-anyos sa Block 12 Lot 8 Durian St. Camella Springville West, Brgy. Molino 3.
Inakyat ng mga suspek ang bahay ng biktima at tinangay ang Dell Laptop, Toshiba Dynabook Laptop, Toshiba Laptop, 2 piraso ng Think Pad Laptop, Lenovo Laptop, Mai Benben laptop, assorted cellphones at 7 cellphone chargers na aabot sa mahigit kumulang sa Php300,000.00 .
Agad namang nagsagawa ng operasyon ang pulisya na ikinaaresto ng dalawang suspek. Narekober sa kanila ang ibang tinangay sa biktima, at dalawang blowgun (sumpak) na karagado ng bala, isang piraso ng 12 gauge na bala at dalawang plastic sachet na naglalaman ng shabu.
- Latest
