Pulis kritikal sa salpok ng motorsiklo
TUGUEGARAO CITY, Cagayan, Philippines — Isang pulis ang nasa kritikal na kondisyon matapos siyang masalpok ng isang motorsiklo habang lulan ng kanyang minamanehong motorsiklo sa bayan ng Iguig sa lalawigang ito kamakalawa.
Kinilala ang biktima na si P/Cpl. Archie Cagurungan, 34, nakatalaga sa Iguig Police at residente ng Barangay San Esteban sa nasabing bayan.
Nakilala naman ang driver na bumangga umano sa pulis na si Ricson Gamata, 32, ng Barangay Awallan sa bayan ng Baggao.
Batay sa inisyal na imbestigasyon ng pulisya, akmang liliko umano ang minamanehong Rusi na motorsiklo ni Cagurungan nang aksidenteng mabangga ng minamanehong Euro motorcycle ni Gamata sa bahagi ng Barangay Minanga Norte.
Sa lakas ng pagkakabangga, nagtamo ng matinding pinsala sa ulo ang pulis na agad isinugod sa pagamutan habang gasgas lamang ang tinamo ni Gamata.
Nahaharap ngayon sa kasong reckless imprudence resulting in serious physical injuries si Gamata na kasalukuyang nasa kustodya ng pulisya.
- Latest
