Governor Fernando nangibabaw muli sa Bulacan

MALOLOS CITY, Bulacan, Philippines — Pormal nang iprinoklama ng Bulacan Provincial Board of Canvassers si reelectionist Bulacan Governor Daniel Fernando matapos magwagi muli sa pinakamataas na posisyon sa lalawigan sa katatapos na pambansang halalan nitong Lunes.

Itinaas ni Atty. Rhene Cruz Jr., provincial election supervisor ang kamay ni Fernando kasama ang newly elected vice governor ng Bulacan na si Board Member Alex Castro sa isang simpleng seremonya kamakalawa ng hapon sa Bulacan Capitol Gymnasium sa nasabing lungsod.

Kumamada si Fernando ng 974,069 boto laban sa kanyang katunggali na si Willy Alvarado na nakakuha lamang ng 577,087 na boto.

Si Fernando ay mananatiling Punong Lalawigan para sa kanyang ikalawang termino.

Ang partner naman ni Fernando na si Castro ay nakakuha ng 744,079 na boto habang ang kanyang mahigpit na katunggali na si dating Governor at 3rd District Congressman Jonjon Mendoza ay nakakuha ng 615,242 na boto, si Castro ang kauna-unahang vice governor na nagmula sa bayan ng Marilao.

Sa mga naglaban naman sa pagka-kongresista, nilampaso ni Atty. Danny Domingo sa Unang Distrito si Rep. Jonathan Alvarado. Kumamada si Domingo ng 202,712 na boto habang 140,798 naman na boto ang nakuha ni Alvarado.

Sa ikalawang distrito, wagi si Tina Pancho laban kay Freddie Bermudez; sa ikatlong distrito, panalong muli si Rep. Lorna Silverio laban kay Jessie Viceo; panalo naman ang nagbabalik na kinatawan na si Linabelle Villarica ng ika-apat na distrito laban kay Guardiano Raquels; ang bagong distrito singko naman ay nasungkit ni Mayor Boy Cruz laban sa kanyang katunggali na si Arty. Arnel Alcaraz.

Ang District 6 ay naipanalo ni Ador Pleyto laban sa mahigpit na katunggali na si Mayor Fred Germar at ang lone district ng San Jose del Monte ay napagwagian ni Rep. Rida Robes laban sa kanyang katunggali na si Rey San Pedro.

Samantala, ang mga nanalong alkalde sa 21 bayan at 3-siyudad sa Bulacan ay sina Jowar Bautista (Angat); Eladio Gonzales Jr. (Balagtas); Fersie Estrella (Baliwag); Jonjon Villanueva (Bocaue); Vergel Meneses (Bulakan); Iskul Juan (Bustos); Lem Faustino (Calumpit); Christian Natividad (Malolos); Henry Villarica (Meycauayan City); Arthur Robes (City of San Jose Del Monte); Ronaldo Flores (Doña Remedios Trinidad); Agay Cruz (Guiguinto); Ricky Silvestre (Marilao); Baby Manlapaz (Hagonoy); Merlyn Germar (Norzagaray); Ding Valeda (Obando); Rico Roque (Pandi); Ann Marcos (Paombong); Jocell Vistan (Plaridel); Maritz Montejo (Pulilan); Gazo Galvez (San Ildefonso); Roderick Tiongson (San Miguel); Cholo Violago (San Rafael) at Omeng Ramos (Sta. Maria).