Rider na nurse, bumangga sa bus, nasagasaan pa ng van
LUCENA CITY, Philippines — Doble ang sinapit na kamatayan ng isang lalaking nurse matapos na ang minamaneho niyang motorsiklo ay bumangga sa isang pampasaherong bus at nang bumagsak ay nasagasaan naman siya ng dumarating na van naganap,kamakalawa sa Purok Ilayang Diversion,Barangay Silangang Mayao.
Ang biktima na idineklarang dead-on-arrival sa Quezon Medical Center dahil sa tinamong pinsala sa ulo at mga katawan ay kinilalang si Robert Baladad, 31,binata ng Pagbilao,Quezon.
Ayon sa pulisya, patungo sa direksyon ng Sariaya, Quezon,alas 8:00 ng umaga ang biktima at minamaneho ang kanyang motorsiklo nang bumangga sa hulihan ng sinusundang DLTB Bus na minamaneho ni Marjon Tatoy ng Laguna.
Tumilapon sa kalye ang biktima saka nasagasaan ng Manila bound na Nissan Urban van na minamaneho ni Edilberto Antonio ng Gumaca,Quezon.
Nasa kustodya ngayon ng pulisya ang driver ng dalawang sasakyang nakaaksidente sa biktima.
- Latest