Bulkang Taal nagtala ng 3 phreatomagmatic burst
MANILA, Philippines — Nakapagtala ng tatlong “phreatomagmatic burst” mula sa Main Crater ng Bulkang Taal kahapon ng umaga, batay sa Taal Volcano Network (TVN) na nagdulot ng plume na may taas na 500 hanggang 900 metro na napadpad sa timog kanluran.
Sa nakalipas na 24 oras, ang TVN ay nakapagtala rin ng 13 volcanic earthquake kabilang ang tatlong volcanic tremor na tumagal ng 2 hanggang 3 minuto at 10 low-frequency volcanic earthquakes.
May naganap na upwelling ng mainit na volcanic gas sa lawa ng Main Crater na lumikha ng plume na may taas na 2,000 metro na napadpad sa timog-kanluran. May 7,856 tonelada naman ng asupre ang nailuwa ng bulkan.
Nananatili namang nasa Alert Level 3 (Magmatic unrest) ang Bulkang Taal na sa kalagayang ito ang magma na nanunuot sa ilalim ng Main Crater ay maaaring magdulot ng karagdagan o malakas na pagputok.
Patuloy na pinagbabawalan ng Phivolcs ang sinuman na manatili sa Taal Volcano Island at sa mga high-risk barangays ng Bilibinwang at Banyaga, Agoncillo at Boso-boso, Gulod at silangang bahagi ng Bugaan East, Laurel, Batangas dahil sa panganib ng pyroclastic density currents at volcanic tsunami.
- Latest