3 ‘holdaper’ ng motor riders, nalambat
SANTIAGO CITY, Isabela, Philippines — Tatlong lalaki na pawang suspek sa panghoholdap ng mga motorcycle riders ang bumagsak sa kamay ng mga awtoridad matapos madakip sa magkahiwalay na lugar sa lalawigang ito, ayon sa ulat ng pulisya kahapon.
Kinilala ng Santiago City Police ang mga nadakip na sina Mack Jay Venturina, 28, construction worker; PeeJay Venturina, 34, dating courier, kapwa ng Brgy. Abra, Santiago City, at Randy Ignacio Andres, 46, construction worker ng Diffun, Quirino.
Sa ulat, nakatanggap ang pulisya ng impormasyon kaugnay sa pagkakilanlan sa dalawang suspek na nangholdap sa dalawang express riders na nahagip ng CCTV camera sa lungsod na ito noong Enero 5, 2022.
Dahil dito, nagsagawa ng follow-up operation ang pinagsanib na puwersa ng City Intelligence Unit ng Santiago City Police Office, Police Station 1 at Police Station 2 na nagresulta sa pagkakadakip ng tatlong suspek.
Unang nadakip ang dalawang Venturina sa Purok 5, Brgy. Abra dakong alas-7:00 ng umaga nitong Martes habang si Andres ay nahuli sa Purok 6, Brgy. San Isidro sa kalapit na bayan ng Diffun.
Narekober sa pag-iingat ng tatlo ang tinatayang nasa P120,000 cash at mga appliances na binili nila gamit ang kanilang tinangay na pera. Nakumpiska kay Andres ang isang 9mm pistol na may lamang limang bala at isang granada habang isang replica ng caliber 45 na baril at isa pang granada ang nakuha kay Peejay Venturina.
- Latest
