LGU employee utas sa motorsiklo
PADRE BURGOS, Quezon, Philippines — Hindi na umabot pang buhay sa ospital ang isang empleyado ng lokal na pamahalaan makaraang maaksidente ang minamaneho nitong motorsiklo sa highway na sakop ng Barangay Hinguiwin, kamakalawa ng hapon.
Ang biktima na nagtamo ng grabeng pinsala sa ulo at katawan ay nakilalang si Marck Mannis Rojas, 32, may asawa, empleyado ng Unisan, Quezon municipal government at residente sa nabanggit na bayan.
Batay sa imbestigasyon, patungo sa Pagbilao, Quezon ang biktima at minamaneho ang isang Yamaha motorcycle.
Pagsapit sa kurbadang bahagi ng kalye dakong alas-4:40 ng hapon ay nawalan ng kontrol sa manibela ang biktima at tuluyàn itong natumba at nag-slide na naging sanhi ng matinding tama sa ulo at katawan.
Sinikap pa itong dalhin ng mga saksi sa pinakamalapit na ospital subalit nalagutan din ng hininga.
- Latest