Lady official ng NPA nalambat sa Bulacan
MARILAO, Bulacan, Philippines — Arestado ang wanted na dalagang pinaniniwalaang finance officer ng New People’s Army (NPA) matapos isilbi ng mga awtoridad ang warrant of arrest laban sa kanya dahil sa kasong pagpatay, kamakalawa ng hapon sa bayang ito.
Kinilala ng pulisya ang sinasabing opisyal ng NPA na si Ma. Lorena Sigua, 44, residente ng Brgy. Muzon.
Sa report, dinakip si Sigua ng warrant section operatives ng San Jose Del Monte (SJDM) Police sa pangunguna ni P/SMS Noel Estanislao kasama ang RIU-3 personnel, Bulacan PIT, RID-3, RIDMD-3, PIDMB, PIB-, 2nd PMFC BULPPO, PHPT Bulacan, 301st MC, RMFB-3 at 24th Special Action Company (SAF) bandang alas-4:00 ng hapon sa Brgy. Patubig, Marilao sa bisa ng alias warrant of arrest na inisyu ni Judge Lou Nueva ng RTC-Branch 7, Bayugan City, Agusan Del Sur na walang piyansang inilaan sa kasong murder noong Hulyo 10, 2019.
Nabatid sa report ng SJDM police na si Sigua ay finance officer ng Regional Operations Command mula sa North Eastern Mindanao Regional Committee (ROC-NEMRC) sa ilalim ni Edelberto Reponte Dabal, commanding officer, inuugnay din siya kay Imelda Rambuyon ng Guerilla Front 21 ng (NEMRC).
Napag-alamang kasalukuyang naka-heightened alert ang SJDM police matapos mahuli at makulong sa kanila ang sinasabing high ranking official ng Bagong Hukbong Bayan.
- Latest