Olongapo mayor positibo sa COVID-19

Olongapo City, Philippines — Nagpositibo sa COVID-19 si Mayor Rolen Paulino Jr. na kanyang inihayag sa pamamagitan ng kanyang facebook page kama­kalawa.

Kamakalawa rin nang sumailalim sa swab test si Paulino sa molecular laboratory ng lungsod na kung saan ay lumabas kinagabihan ang resulta na positibo sa virus ang alkalde.

Kasalukuyang naka home quarantine si Paulino na maayos naman umano ang kalagayan.

Ayon pa sa alkalde ay hindi nito alam kung kanino o saan siya na-expose sa COVID-19.

Sa kabila nito ay tiniyak niyang tuloy ang kanyang trabaho at serbisyo ng lokal na pamahalaan para sa kanyang mga kababayan.