4 nalambat sa dynamite fishing
ORION, Bataan, Philippines — Apat na magkakamag-anak ang naaresto ng Philippine National Police-Maritime Group matapos maaktuhan silang gumagamit ng mga dinamita sa pangingisda sa karagatang sakop ng bayang ito.
Kinilala ni Bataan PNP Maritime Station chief P/Major. Leonardo Alcantara, ang mga nadakip na mangingisda na sina Glendo Malaras, 51-anyos; Gilbert Malaras, 42-anyos; Jonathan Malaras, 26 at Glendel Malaras, 26; pawang mga taga-Ligtong Uno, Rosario, Cavite.
Nahuli umano sa akto ng mga nagpapatrolyang pulis sa karagatan ang mga suspek habang nagsasagawa ng iligal na pangingingisda gamit ang pampasabog o dinamita.
Nakumpiska sa mga suspek ang limang (5) boteng improvised explosive o dinamita; bangkang de motor; compressor; hose at ilang kilong isdang putok (tamban) o huli gamit ang dinamita.
Nahaharap ang mga suspek sa kasong paglabag sa RA 10654 Section 92 o Anti-Illegal Fishing Act dahil sa pagggamit ng explosive device sa iligal na pangisngisda.
- Latest
