2 lalaki todas sa ambush sa Rizal

MANILA, Philippines — Dalawang lalaking magkaangkas sa motorsiklo ang patay nang tambangan at pagbabarilin ng riding-in-tandem sa Binangonan, Rizal kamakalawa ng hapon.

Mga tama ng bala sa ulo ang tumapos sa buhay ng mga biktimang nakilala lang na sina Kzerdrick Saynes at Geovemar Caña habang nakatakas ang mga salarin sa krimen.

Batay sa ulat ng Binangonan Municipal Police, alas-4:30 ng hapon habang magkaangkas umano ang dalawang biktima at binabagtas ang Upper Kasinay sa Brgy. Darangan nang bigla silang tambangan ng dalawang suspek na magkaangkas din sa motorsiklo. Bigla na lang umanong bumunot ng baril ang backrider at saka ilang ulit na pinagbabaril sa ulo ang mga biktima na kaagad na namatay at saka bumagsak sa sementadong kalsada.

Nang matiyak ng mga suspek na napuruhan ang kanilang target ay mabilis silang humarurot ang mga ito at tumakas.