Misis sinaway ang maingay na kapitbahay, pinatay
GUMACA, Quezon, Philippines — Idineklarang dead on arrival sa ospital ang isang 32-anyos na ginang matapos na ataduhin nang saksak ng kapitbahay na sinaway nito sa pag-iingay, kamakalawa sa Purok 7, Barangay Calumanguin ng bayang ito.
Ang biktima na nagtamo ng mga saksak sa iba’t ibang parte ng katawan ay kinilalang si Janna Delos Santos, 32,samantalang ginagamot naman sa Gumaca District Hospital ang bayaw nitong sina Aldrin, 27 at Arnel Obligasyon, 32.
Tinutugis na ang suspek na si Eric Tutong, may sapat na gulang at residente sa nabanggit na lugar.
Base sa ulat ng pulisya, bandang ala-1:40 ng madaling araw ay nagising ang biktima sa mahimbing na pagkakatulog dahil sa pag-iingay ng suspek sa harapan ng kanilang bahay.
Lumabas ang biktima at sinaway ang lasing na suspek sa pag-iingay, subalit sunud-sunod na saksak ang ibinigay dito.
Bagama’t sugatan ang biktima ay nagawang makatakbo at humingi ng saklolo sa dalawang bayaw gayunman ay pinagsasaksak din sila ng suspek na mabilis na tumakas.
- Latest
