7 drug suspects timbog sa P13 milyong marijuana
TABUK CITY, Kalinga, Philippines — Pitong drug suspects ang naaresto ng mga otoridad sa isang police operation at nasamsam sa kanila ang nasa P13 milyong halaga ng marijuana kamakalawa sa nasabing lalawigan.
Unang naaresto ang apat na suspek na kinilalang sina Augusto Galicia, 39, ng Antipolo City; Eduardo Patiga, 39 ng Makati City; Wenceslao Galicia, 24 ng Pasig City; at John Benedick Camia, 22 ng Imus, Cavite.
Ayon sa report, sakay ang apat na suspek ng Toyota Innova (NGF-5992) upang ibiyahe ang nasa 112 marijuana bricks na may tig-isang kilo ang timbang na bawat isa sa Metro Manila nang masabat ang mga ito ng mga otoridad sa Brgy. Bantay, alas-10:00 ng umaga.
Hindi na nakapalag ang apat at ikinanta ang tatlo pang kasama na naaresto habang nagpapagasolina sa Barangay Arellano, Quezon, Isabela sakay ng isang Suzuki Ertiga (NAN-5792).
Kinilala ang mga suspek na sina Prince John Lord Paluyo, 20, ng General Trias, Cavite; Cyrus Crisologo,18 at isang 17- anyos na taga Antipolo City.
Nasamsam sa mga ito ang mga pinatuyong dahon ng marijuana na naka cylindrical packages at cannabis oil na may halagang P196,000 at isang sumpak.
Ayon sa mga imbestigador, ang mga nasamsam na marijuana ay galing pa ng Tinglayan, Kalinga. Inihahanda ng pulisya ang mga kasong kriminal laban sa mga nadakip.
- Latest