‘Person of interest’ sinisiyasat sa pagkamatay sa 12-anyos
Indiscriminate firing sa pagsalubong ng Bagong Taon
MANILA, Philippines — May “person of interest” na ang pulisya sa kaso ng indiscriminate firing na kumitil sa buhay ng isang 12-anyos na nene sa pagsalubong ng Bagong Taon sa Lanao del Norte, ayon sa ulat kahapon.
Sa report ni P/Col. Isaias Bacurnay, officer-in-charge ng Lanao del Norte Provincial Police (PPO), iniimbestigahan na nila ang nasabing person of interest na tinukoy ng mga kamag-anak ng biktimang si Suzette Abrigando.
Si Abrigando ay tinamaan ng bala matapos ang indiscriminate firing ng ‘di kilalang suspect sa Brgy. Poblacion, Sapad, Lanao del Norte sa kasagsagan ng pagsalubong sa Bagong Taon.
Ayon kay Bacurnay, ang suspect ay residente rin ng Brgy. Poblacion kung saan ikinokonsidera nilang person of interest. Gayunman, tumanggi siyang ihayag ang pangalan nito dahil kailangan pang isailalim sa paraffin test at sa ballistic test ang baril nito upang makumpirma kung siya nga ang nagpaputok ng baril na ang bala ay sumapol sa bata.
Kasalukuyan nang nagsasagawa ng cross matching mula sa cal. 45 pistol na narekober mula sa nasabing person of interest. Ang basyo ng bala ng cal. 45 pistol ay narekober sa isinagawang pag-awtopsiya sa bangkay ng nasawing bata.
- Latest
