2 dedo, 8 sugatan sa road mishap
CAMP NAKAR, Lucena City, Philippines — Dalawa ang nasawi at walo ang nasugatan sa magkahiwalay aksidente sa lalawigan ng Quezon kamakalawa.
Ayon kay Quezon Police Provincial Office (QPPO) director P/Col. Audie Madrideo, patay agad ang rider na si Melanie Villaflor, 32, dalaga ng Brgy. Malinao Ilaya, Atimonan, Quezon makaraang magulungan ng Tanker Trailer truck ni Roy Aceras, 45, ng Pili, Camarines Sur alas-4:05 ng hapon sa Maharlika Highway, Brgy. Sta.Catalina, Atimonan. Nasugatan ang dalawang backriders ni Villaflor na sina Jacquelyn Argulla, 18, at isang 16-anyos na babae na kapwa ginagamot sa ospital.
Dead-on-arrival naman sa Candelaria District Hospital dahil sa pagkabasag ng bungo si John Paul Guno, 21, binata ng Brgy. Sampaloc 2, Sariaya, Quezon makaraang banggain ang minamaneho nitong Toyota Wigo ng kasalubong na Toyota Hi-Ace van sa Maharlika Highway sa Brgy. Sto. Cristo, Sariaya dakong alas-10:50 ng gabi.
Ginagamot naman sa nasabi ring ospital ang driver ng van na si Alvin Regalario, 35, ng Sto.Tomas, Batangas at limang sakay na nasugatan na sina Michael Uy, at magkakaanak na sina Eva Paynante, 43; Michelle, 25, Madelyn, 18 at Angelita Paynante Manalo, 75.
- Latest