16 barangay sa Cagayan ‘di pa mapasok ng rescuers
Dahil sa matinding baha
MANILA, Philippines — Aminado ang mga tauhan ng rescue operations na hirap nilang mapasok ang nasa 16 sa 22 barangay sa Enrile, Cagayan ang isolated o mahirap mapuntahan dahil sa matinding pagbaha matapos manalasa ang bagyong Ulysses.
Sinabi ni Enrile Mayor Miguel Decena Jr., tanging ang mga dump trucks na may dalang relief goods lang ang nakatatawid papunta sa mga barangay.
Ayon kay Decena, dahil sa marami pang katao na ayaw magpa-evacuate, hinikayat na lamang nila ang mga residente na ipatupad ang “adopt a neighbor.”
Sa ilalim ng “adopt a neighbor”, pansamantalang kukupkupin ng mga residente na may dalawa o tatlong palapag na bahay ang kanilang mga kapitbahay na nalubog sa baha ang mga tahanan.
Umapela naman ang mga taga-Enrile ng pagkain, maiinom na tubig, at mga kahoy pangkumpuni ng kanilang mga bahay.
Lumubog ang malaking bahagi ng Cagayan province mula noong Biyernes dahil sa tubig na nanggaling sa mga nakapaligid na lalawigan at pagpapakawala ng tubig ng Magat Dam kasunod na rin ng walang puknat na pag-ulan at hangin sa paghagupit ng bagyong Ulysses sa Luzon.Sa kabila nito, unti-unti namang bumabangon ang ibang residente matapos humupa ang baha sa ibang barangay.
- Latest
