Ulysses nagdulot ng baha, pagguho sa Quezon province
LUCENA CITY, Philippines — Nagdulot ng pagbaha, pagguho ng lupa, at kawalan ng kuryente ang Bagyong Ulysses sa ilang lugar sa Quezon province.
Magdamag naranasan ang malakas na hangin at pag-ulan sa lalawigan, kung saan 3 beses nag-landfall ang Bagyong Ulysses kahapon ng madaling araw.
Nabatid na 39 bayan at 2 lungsod ng lalawigan ng Quezon ang pinadapa.
Unang binayo ng bagyong Ulysses ang islang bayan ng Patnanungan at isinunod ang Burdeus na kabilang sa Polilio Group of Islands (POGI) saka nanalasa sa bayan ng General Nakar na saklaw ng Hilagang bahagi ng lalawigan.
Bagama’t maagang nakapaghanda sa posibleng epekto ng bagyo ay lumubog sa tubig baha ang Infanta, Quezon at nakaapekto sa mahigit 3,000 pamilya.
Tuluyan ng hindi nadaanan ng lahat ng uri ng behikulo ang Barangay Canda Ibaba sa Lopez, Quezon matapos na ito ay muling palubugin ng lampas taong lalim na tubig baha.
Maraming mga palayan din sa nasabing bayan ang nagmistula nang karagatan gayundin ang mga kalapit na bayan ng Gumaca, Calauag, Guinayangan at Tagkawayan at gumamit ng bangka ang mga residente upang lumikas patungo sa matataas at ligtas na lugar.
Pinalubog din ng tubig baha ang ilang bayan sa ikatlong distrito ng lalawigan at hindi madaanan ang Maharlika highway sa Mauban, Quezon dahil sa landslide.
- Latest