Trike driver binoga sa resto bar
BULAN, Sorsogon, Philippines — Namatay noon din ang isang 33-anyos na tricycle driver matapos itong barilin sa ulo ng isang salarin habang nakikipag-inuman sa loob ng isang resto bar sa Sitio Pawa, Brgy. Lajong ng nasabing bayan at lalawigan, kamakalawa ng gabi.
Kinilala ang nasawi na si Jeric Gallanosa Gustillo, residente ng Brgy. San Vicente. Habang mabilis na tumakas ang hindi pa nakikilang suspek.
Sa ulat, alas-11:25 ng gabi ay masayang nakikipag-inuman ang biktima sa kanyang kaibigan na si Alfred Daro nang lumapit ang hindi nakilalang gunman at walang kaabog abog na binaril ito sa ulo.
Ayon kay Daro, pinaniniwalaan niyang posibleng kasamahan ang suspek ng anim na mga lalaki na nag-iinuman sa kabilang lamesa na pawang tumakas lulan ng dalawang sasakyan.
Nakuha ng mga respondeng pulis sa crime scene ang isang basyo ng Kalibre 9mm na baril.
- Latest