NPA squad leader, 5 pa sumuko
MANILA, Philippines — Sumuko sa tropa ng pamahalaan ang anim na rebeldeng New People’s Army (NPA) kabilang ang isang squad leader sa Maguindanao nitong Biyernes.
Kinilala ni Lt. Col. Alaric Avelino delos Santos, spokesman ng AFP-Western Mindanao Command (AFP-Westmincom) ang mga sumuko na sina Sonny Florencio alyas “Ka Nestor /Pitaw” na nagsisilbing pinuno ng 1st Squad, Dragon Fruit Platoon, Sub Regional Command Daguman ng Far South Mindanao Regional Committee ng NPA Command; Darwin Lion Buti alyas Kong, 24, ng Lebak, Sultan Kudarat; assistant medic at liaison officer Cherry Mobile Platoon; Aquilyn Dulunan Buti, 23, isa ring medic; Kenken Angkeg alyas “Ka Speed”, 26; Ariel Angkeg, 26 at Eric Angkeg, 48; pawang residente ng Upi, Maguindanao.
“The six affirmed the resentful system of the communist terrorist group of merely propagating false ideologies to the people of Maguindanao,” pahayag naman ni AFP–Westmincom Chief Lt. Gen. Vinluan, Jr.
Sinabi ni Vinluan na nagdesisyong sumuko ang grupo ni Florencio matapos na mapagtantong mali ang ideolohiyang kanilang ipinaglalaban at bukod dito’y pagod na sila sa matinding gutom saka hirap na tiniis sa kagubatan habang mistulang mga dagang tinutugis ng mga sundalo.
Sumuko ang anim na rebelde sa himpilan ng 6th Infantry Battalion (IB) ng Philippinbe army sa Brgy. Mirab, Upi, Maguindanao. Sila ay iprinisinta dakong alas-11 ng umaga kamakalawa kay Joint Task Force (JTF) Central Commander Major Gen. Juvymax Uy. Isinurender din nila ang isang cal 16 rifle, isang cal 30 garand rifle, dalawang M79 grenade launcher, isang cal. 45 pistol, dalawang magazine para sa M16 rifle na may 14 rounds ng bala, isang magazine para sa cal. 45 pistol na may anim na rounds ng bala at dalawang rounds ng 40mm na baril.
- Latest
