Pugot na ulo, tadtad ng sugat natagpuan
MANILA, Philippines — Nagulantang ang mga residente matapos na matagpuan ang isang pugot na ulo na tadtad ng mga sugat sa mukha na halos hindi makilala ang natagpuan sa baybaying dagat ng Brgy. Looc, Mandaue City nitong Sabado ng hapon.
Sa ulat ng Police Regional Office (PRO)-7, dakong ala-1:30 ng hapon nang matagpuan ang pugot na ulo, may isang linggo matapos na makita namang lumulutang sa ilog ang walang ulo, kamay at mga hita ng isang hindi pa nakilalang babae sa Brgy. Talamban sa lungsod ng Cebu.
Isa sa mga residente na nakakita sa nasabing pugot na ulo ang nag-report ng insidente sa mga awtoridad. Napatakbo umano siya sa matinding pagkabigla at agad ipinamalita sa kanilang komunidad ang nakitang pugot na ulo.
Magugunita na noong nakalipas na Oktubre 24 ay natagpuan ang walang ulo, kamay at mga pang katawan ng isang babae sa Brgy. Talamban, Cebu City at sumunod naman ay kamay at mga paa nito sa baybayin din ng Brgy. Looc sa Mandaue City.
Patuloy naman ang pagsusuri ng mga forensic experts sa natagpuang pugot na ulo upang makilala ito.
- Latest