Ilagan City, Isabela isinailalim sa ECQ
Matapos mabigo sa MECQ
TUGUEGARAO CITY, Cagayan , Philippines — Dahil sa pagkabigo na masawata ang pagtaas ng kaso ng COVID-19 mula sa ipinatupad na dalawang linggong modified enhanced community quarantine (MECQ) na nagtapos kahapon, isinailalim na kagabi sa enhanced community quarantine (ECQ) ang buong Ilagan City sa Isabela.
Ito ay matapos na sang-ayunan ng Regional Inter-Agency Task Force on the Management of Emerging Infectious Disease ang endorsement ni Isabela Governor Rodolfo Albano III na pinakamataas na yugto ng lockdown sa Ilagan City.
Ayon kay Ilagan City Mayor Jose Marie Diaz, ang ECQ ay epektibo alas-8:00 kagabi (Biyernes) na magtatapos hanggang Oktubre 30.
Ilan sa mga ipapatupad na panuntunan sa ECQ ay ang liquor ban at pamamasada ng pampublikong sasakyan upang maibsan ang pagliliwaliw ng mga tao.
Mula Oktubre 1-16, nakapagtala ang lungsod ng 245 na bagong COVID-19 cases na mas malala sa 270 na naitala sa loob ng dalawang buwan sa Solano, Nueva Viscaya na matinding tinamaan ng community transmission noong Agosto at Setyembre.
Dahil sa lawak ng hawaan, naglabas din ng Executive Order si Mayor Diaz na idinedeklarang “Day of Prayer” ang Oktubre 18 upang mabigyan ng pagkakataon ang mga Ilagaueño na magnilay at ipanalangin ang kanilang kaligtasan sa pandemya.
Matatandaan na inilagay sa MECQ ang Ilagan City mula Oktubre 6-16 matapos na halos kalahati ng 91 na barangay dito ang apektado sa matinding hawaan.
- Latest
