20 pasyente at bantay tinamaan ng COVID-19
Dahil sa pagsisiksikan sa OB ward ng ospital
MALOLOS CITY, Bulacan — Kinumpirma kahapon ng isang opisyal ng Bulacan Medical Center na nasa 20 pasyente na karamihan ay buntis at kanilang mga bantay sa OB Ward ng nasabing ospital ang nagpositibo sa coronavirus disease (COVID-19).
Ayon kay Dr. Hjordis Marushka Celis, director ng nasabing ospital na agad ipinatupad ang lockdown sa kanilang OB Ward matapos na magpositibo sa virus ang mga pasyente at kanilang mga bantay.
Idinetalye ni Dr. Celis na isinasailalim talaga sa swab testing ang mga buntis at “high risk” patients upang maiwasan ang pagkalat ng COVID- 19, pero sa kasamaang palad apat pa sa kanila ang nahawa sa virus noong Setyembre 11.
“Immediately nag-stop na ang admission noon, ni-lockdown na ang OB at NICU, we observed 352 individuals. Ito ay mga pasyente, babies, kasama ang mga bantay at pina-swab then inilipat ang iba sa BICC, ‘yung iba dinala sa mga treatment facility ng kani-kanilang LGUs. Lahat ng nag-negative, nai-coordinate na rin sa mga LGUs para iku-quarantine, pwedeng sa facility o sa bahay, ang mahalaga, monitored,” pahayag ng direktor.
Ipinaliwanag din ni Celis na dahil sa rami ng pasyente, malaki ang tiyansa na magkahawahan.
“The ideal capacity of the OB including the gyne, and isolation is 82 only, but we have 180 mothers there, imagine 3-4 patients sharing in one bed,” ani Celis.
Pinabulaanan din ni Celis ang mga alegasyon ng ilang netizens na pinapalitan ang resulta ng test upang magpositibo sa virus ang mga pasyente para makakuha ng ayuda mula sa PhilHealth.
Sa pinakahuling tala, pumalo na sa 4,389 ang kumpirmadong kaso ng COVID-19 sa Bulacan, 2,618 dito ang gumaling na habang 90 ang namatay.
- Latest