Pasugalan ni-raid: 5 SAP/4Ps beneficiaries, 3 pa huli
SAN JOSE CITY, Nueva Ecija – Arestado ang walo katao kabilang ang limang benepisyaryo ng Social Amelioration Program (SAP) at Pantawid Pamilyang Pilipino Program (4Ps) matapos maaktuhang nagsusugal ng “Pusoy” sa gitna ng pinaiiral na modified general community quarantine (MGCQ) sa lalawigang ito na dulot ng COVID-19 pandemic sa ginawang pagsalakay ng pulisya sa sinasabing “gambling den” sa Brgy. Abar 2nd, dito sa lungsod na ito, kahapon ng madaling-araw.
Ayon kay Police Lt. Col. Heryl Bruno, hepe ng San Jose City Police, apat sa mga naaresto ay nakatanggap ng cash aid ng SAP habang ang isa ay miyembro ng 4Ps.
Kinilala ni Bruno ang mga naarestong suspek na SAP beneficiaries na sina Mark Lester Anthony Clemente, 26-anyos; Joseph Gaspar, 34, may-asawa; Liza Ombrobeno, 60, may-asawa; at Lolita Garcia, 68, may-asawa; 4Ps member namang si Edmon Biendima, 47, may-asawa; at iba pang kasamahan na sina William Lomboy, 30, binata; Jonathan Arataquio, 18, binata; at Renalyn Pascua, 31, may-asawa; pawang mga residente ng Brgy. Abar 2nd, ng nasabing lungsod.
Sa ulat, nakatanggap ng impormasyon ang pulisya na may nagaganap na sugalan sa nasabing lugar at nang kanila itong salakayin bandang ala-1 ng madaling-araw ay naaktuhan nila ang mga suspek na abalang naglalaro sa dalawang mesa ng “Pusoy” gamit ang cards at may perang taya.
Kinumpiska ng pulisya ang dalawang set ng mga baraha, 8 piraso ng upuan, 2 mesa at bet money na umaabot sa P1,957 sa iba’t ibang denominasyon. Ang mga suspek ay mahaharap sa kasong paglabag sa P.D. 1602 at paglabag sa curfew dahil sa umiiral MGCQ sa lalawigan.
- Latest
