Trak salpok sa poste at puno, driver patay
TAGKAWAYAN, Quezon, Philippines — Hindi na umabot pang buhay sa ospital ang isang driver makaraang bumangga ang kanyang minamanehong truck na may karagang 800 sako ng sibuyas sa poste ng ilaw at puno sa gilid ng Quirino Highway, Barangay Sta. Cecilia ng bayang ito kamakalawa ng gabi.
Ang biktima na nagtamo ng grabeng pinsala sa ulo at katawan ay kinilalang si Armando Parcon, 54, may asawa at residente ng Negros Occidental.
Ayon sa ulat ng pulisya, patungo sa Bicol Region ang biktima at minamaneho ang isang truck (RNE-526) na kargado ng daan-daang sako ng sibuyas.
Pagsapit umano sa kurbadang bahagi ng nasabing highway ay nawalan ng preno ang trak dakong ala-1:50 ng gabi kung kaya nawalan ng kontrol sa manibela ang biktima at binangga ang poste ng Quezelco gayundin ang isang puno ng acacia.
Mabilis na isinugod ng mga saksi ang tsuper sa pinakamalapit na ospital subalit nalagutan din ng hininga.
- Latest