2 ‘adik’ nasabat sa checkpoint
Tuguegarao City Cagayan, Philippines — Arestado ang dalawang umano’y adik sa droga na nagbibiyahe ng van na may kargang illegal narra lumber matapos maharang sa checkpoint at makuhanan pa ng shabu ng mga awtoridad sa Brgy. Libertad, Abulug, Cagayan noong Lunes.
Kinilala ni Major Joefersson Gannaban, hepe ng Abulug Police ang mga inaresto na sina Jonnel Tagpuno na drayber ng Toyota Hi Ace van (VN 2406) at alalay niyang si Adrian Dela Cruz na pawang taga-Marikina City.
Ayon kay Gannaban, nadiskubre sa loob ng van na kinalas ang mga upuan ang kabuuang 500 board feet na narra na isang uri ng banned species na kahoy.
Nasamsam din sa dalawang nadakip na pawang sabog pa umano sa droga ang tatlong sachet ng shabu at sari-saring drug paraphernalia, dagdag ni Gannaban.
Nabatid na ang mga kahoy na narra ay mula sa Sta. Ana, Cagayan at idedeliber sana ng dalawang suspek sa Taytay, Rizal.
- Latest
