Misis pinasok, itinumba sa harap ng anak
MANILA, Philippines — Patay ang isang ginang matapos na pasukin at barilin ng mga armadong lalaki sa harap ng kanyang anak sa Purok 6, Brgy. Poblacion, Compostela Valley kamakalawa ng gabi.
Kinilala ang biktima na si Armie Angcot Bernardo, 33-anyos at residente sa nasabing lugar.
Ayon sa ulat ng Compostela Municipal Police, alas-6:00 ng gabi habang nasa loob lamang ng kanilang bahay ang biktima nang biglang dumating ang ‘di pa nakilalang mga suspek na sakay ng motorsiklo.
Isa sa mga suspek ang bumaba sa motorsiklo at hinanap ang biktima dahilan para tawagin naman ng anak nitong 14-anyos. Gayunman, paglabas ng misis ay nagkasagutan sila ng suspek at tinatanong kung gusto pa ba niyang magtrabaho sa Sunshine Karton.
Sa puntong ito, hindi na nakasagot ang biktima hanggang sa marinig na ng anak niyang binatilyo ang sunud-sunod na putok ng baril.
Nang puntahan ng anak ay nakita na lamang na naliligo sa sariling dugo ang ina habang mabilis na tumakas ang mga suspek.
- Latest
