Guro, 4 pang kapamilya grabe sa ‘hit and run’
LAGUNA, Philippines – Isang guro at apat na miyembro ng pamilya nito ang malubhang nasugatan makaraan silang salpukin ng isang rumaragasang trak at takasan sa Brgy. Sta. Maria Magdalena, San Pablo City kahapon ng madaling-araw.
Kinilala ang mga biktima na sina Juanita Velasco Abainza, 53-anyos, guro ng Imok Elementary School at kapatid ng The Philippine Star employee na si Gener Velasco; anak na si Jashly Ray Ivan na kapwa naka-confine sa Batangas City Hospital para sa fracture operation habang ang mister nito na si Mariano, 65, at dalawa pang anak na sina Ray Anne Jade, 15, at Jewelrie May, 15, kapwa estudyante ay isinugod sa PPL Hospital para sa karampatang lunas.
Sa ulat ng pulisya, kagagaling lamang ng pamilya Abainza sa burol ng kanilang kaanak at pauwi na lulan ng tricycle na minamaneho ni Mariano nang maganap ang insidente. Dakong alas-3 ng madaling-araw papuntang direksyong Calauan town proper ang nasabing pamilya nang pagsapit sa Brgy. Sta. Maria Magdalena ay binangga sila ng humahagibis na trak na sumakop sa kanilang linya saka sila tinakbuhan ng ‘di kilalang driver.
Sinusuri na ng pulisya ang CCTV sa lugar na makakatulong upang matukoy ang truck at driver nito. Nanawagan naman ang pamilya Velasco sa mga awtoridad na agad na tukuyin at papanagutin ang responsable sa hit and run.
- Latest