Totoy hinabol ng aso, durog sa bus
LEGAZPI CITY, Albay, Philippines — Nadurog ang murang katawan ng isang 12-anyos na batang lalaki matapos mabangga ng bus makaraang biglang tumawid sa kalsada nang habulin siya ng aso sa kahabaan ng Maharlika National Highway sa Brgy. San Rafael, Castilla, Sorsogon kamakalawa ng gabi.
Dead-on-the-spot ang biktimang si Alfred Discaya Magallon, residente ng nasabing barangay habang pinaghahanap ng mga awtoridad ang driver at co-driver ng nakabanggang bus na tumakas makaraan ang aksidente.
Sa ulat, dakong alas-7 ng gabi, binabagtas ng Eagle Star bus (AAl-1968) ang kahabaan ng highway mula sa Maasin, Leyte patungong Maynila nang pagdating sa palikong bahagi ay nabangga ang bata na biglang tumakbo at patawid ng kalsada makaraang habulin naman ng galang-aso.
Sinubukan pang isugod ng mga residente sa Vicente Peralta Hospital ang totoy pero idineklarang patay.
Nakita naman ng ilang residente ang hindi nakilalang driver at co-driver na itinigil ang kanilang bus malapit sa tulay at tumatakbong tumakas patungo sa hindi malamang direksyon.
- Latest