Bading na nambibiktima sa FB, tiklo sa NBI
MALOLOS CITY, Bulacan , Philippines — Dinakma ng NBI sa isang entrapment operation kahapon ng umaga sa siyudad na ito ang isang bakla matapos na ireklamo ng isang 16-anyos na lalaki ng robbery/extortion na nabiktima nito sa social media.
Ang suspek ay nakilalang si Lheovi Reyes, 35-anyos ng Paombong, Bulacan na nakakulimbat ng pera at mahahalagang gamit sa biktimang itago sa pangalang Rod.
Si Reyes ay gumamit ng pekeng profile picture sa social media para makapanloko ng mga target na biktima, isa na rito si Rod.
Nabatid na Grade 8 pa lamang ang biktima noong 2016 at nag-aaral sa isang exclusive school sa Malolos nang magsi-mula siyang perwisyuhin ng suspek na nakipagkaibigan sa Facebook gamit ang profile picture ng isang maganda, sexy at batang babae.
Matapos magpalitan ng sexy pictures, kalaunan ay lumantad na ang suspek na isa pa lang bading at humirit na makipag-sex sa biktima.
Nang tumanggi ang menor-de-edad, doon na siya sinimulang takutin at kikilan ng pera at mga gamit. Nagbanta na kung hindi magbibigay ang binatilyo ay ilalantad ng bading ang mga larawan ng una at pupunta sa bahay nila para ipilit na makipag-sex sa kanya.
Grade 11 na ngayon ang menor-de-edad na biktima at hindi na niya makayanan ang trauma at panggigipit ng suspek sa kanya kaya napilitan na siyang magtapat sa mga magulang na humingi ng tulong sa NBI.
Nabatid na nasa P2,000-P30,000 ang hinihingi ng suspek sa biktima kada buwan bukod pa sa mga signature clothes, shoes, jewelry, watch, at iba pa.
Ayon sa lumuluhang biktima, madalas siyang mangkupit ng pera ng mga magulang at kinukuha ang mga mamahaling gamit ng kapatid nito upang may maidagdag lamang na ibigay sa suspek dahil sa matinding pananakot nito.
- Latest