Kuya na may ‘sayad’ kinatay ng utol
LEGAZPI CITY, Albay, Philippines — Agad nasawi ang isang 22-anyos na binata na may sakit umano sa pag-iisip matapos na pagsasaksakin ng nakababatang kapatid sa loob mismo ng kanilang bahay sa Sitio Lugsadan, Brgy. Bote, Bato, Catanduanes kamakalawa ng gabi.
Agad nasawi dahil sa dami ng saksak na tinamo sa katawan ang biktimang si Joseph Chavez Templonuevo habang arestado at sinampahan na ng kasong pagpatay ang suspek na si Jaimes Chavez Templonuevo, 18-anyos.
Sa ulat, dakong alas-8 ng gabi habang nasa loob ng kanilang bahay ang magkapatid nang sa ‘di malamang dahilan ay nilapitan ng suspek ang kanyang kuya at bigla na lang sinaksak sa dibdib at sa iba’t ibang bahagi ng katawan.
Dahil sa kaguluhan sa loob ng bahay, napasugod ang mga kamag-anak pero inabutang duguan at patay na ang biktima habang nasa tabi ang kanyang nakababatang kapatid.
Hindi pa malaman kung ano ang pumasok sa isip ng suspek at pinaslang ang kanyang kuya habang patuloy ang ginagawang imbestigasyon ng pulisya sa insidente.
- Latest