2 ‘tulak’ bulagta sa buy-bust
NUEVA ECIJA, Philippines — Nasawi ang dalawang hinihinalang drug suspect makaraang manlaban umano sa magkahiwalay na buy-bust operation ng pulisya sa lalawigan, ayon sa ulat kahapon.
Kinilala ni Police Col. Leon Victor Rosete, Nueva Ecija Police provincial commander, ang dalawang napatay na sina Juanito Reyes, ng Brgy. San Juan, Aliaga, NE; at Rhandel Ignacio ng Brgy. San Juan Accfa, Cabanatuan City.
Sa ulat ng Aliaga Police, nagsagawa umano sila ng buy-bust operation sa Brgy. San Emiliano, Aliaga, bandang alas-8:30 ng gabi noong Lunes laban sa suspek na si Reyes. Nakatunog si Reyes na pulis ang katransaksyon kaya bumunot ng baril at ipinutok sa poseur-buyer na nakailag at nakaganti ng putok na ikinamatay ng suspek na nakuhanan ng isang plastic sachet ng umano’y shabu at caliber .38 baril nito.
Samantala, alas-11:30 ng gabi noong Linggo nang mapatay ng mga pulis sa shootout sa Brgy. Carmen, Zaragoza ang dayong si Ignacio na nasa drug watchlist ng Cabanatuan City. Nakuha sa suspek ang tatlong plastic sachet ng umano’y shabu, 1 caliber .38 revolver, at P1,000 buy-bust money.
- Latest