Coastguard pinasok, kinatay ng 2 ‘Akyat-Bahay’
CAVITE , Philippines — Isang mister na miyembro ng Philippine Coast Guard (PCG) ang agaw-buhay matapos na pagsasaksakin ng kanilang dalawang dating electrician na hinihinalang mga miyembro ng “Akyat Bahay Gang” nang maaktuhan nito ang mga suspek na nagnanakaw sa loob mismo ng kanyang bahay sa Brgy. Layong Mabilog, Maragondon ng lalawigang ito kahapon ng madaling araw.
Kinilala ang biktima na si Jun Jun Martal, 30-anyos, na nagtamo ng mga saksak sa katawan. Bagama’t hindi nasaktan, tulala ang misis nito na si Maylyn, 24-anyos, dahil sa pangyayari.
Arestado naman ang isa sa suspek na nakila-lang si Raymart Camacho 31-anyos, residente ng Caloocan City habang tinutugis ang kasama nitong si Alfred Abata, ng Brgy. De Ocampo, Trece Martirez City.
Sa ulat, dakong alas-2:00 ng mada-ling araw habang nasa kasarapan ng tulog ang mag-asawang Martal nang maalimpungatan ang mister kung kaya bumangon upang mag-CR. Subalit nabulaga siya nang makita sa loob ng kanilang bahay ang dalawang lalaki na ang isa rito ay nakahubad pa pang-itaas. Hindi pa nakakapagsalita ang biktima, agad na siyang sinugod ng mga suspek at inundayan ng sunud-sunod na saksak.
Kahit na duguan, pilit na nanlaban ang mister sa mga suspek at nagsisigaw ng tulong. Agad namang narinig ng mga kapitbahay kaya mabilis na sumaklolo hanggang sa masukol ang isang kawatan at nakatakbo ang kasama.
Mabilis na isinugod sa pagamutan ang mister na nagtamo ng ilang tama ng saksak habang narekober ng pulisya ang patalim na ginamit sa krimen.
Sa imbestigasyon, sinabi ng pulisya na ang dalawang suspek ay ang nag-ayos ng mga electrical wirings sa bahay ng pamilya Martal kung kaya napag-aralan nila kung paano ito pasukin.
- Latest
