‘NPA’ na suspek sa pag-atake, itinumba
TUGUEGARAO CITY, Cagayan , Philippines — Brutal na pinatay ng mga berdugo ang sinasabing rebeldeng New People’s Army (NPA) na isinasangkot sa paglusob noong Abril sa bahay ng kanilang opisyal ng barangay matapos siyang tambangan sa Brgy. Colorado, San Guillermo, Isabela noong Huwebes.
Duguang nakabulagta sa lupa matapos dumausdos sa kanyang motorsiklo ang biktima na si Alberto Gumallaui, 48, nang ratratin pa sa ulo ng killer dakong alas-4:30 ng hapon, ayon sa report na nakarating kay Maj. Mariano Marayag, hepe ng San Guillermo Police.
Hinayaan namang makatakas ng mga suspek ang angkas na lolo ni Gumallaui na si Lucas Pinao-An, 68, upang makahingi ng saklolo para dalhin ang biktima sa ospital subalit idineklara nang patay ng mga manggagamot.
Isa si Gumallaui na isinasangkot ng mga saksi sa paglusob sa bahay ng kanilang kapitan sa Barangay Burgos na si Eliseo Miguel at Kagawad Rolan Piscador noong kainitan ng kampanya ng nakaraang halalan.
Sa insidente, sugatang tinamaan sa puwet ang isang bisita ni Piscador nang pagbabarilin ng mga armado ang bahay nila ni Miguel.
- Latest
