Engkuwentro sa plantasyon: 3 bulagta
MANILA, Philippines — Nasawi ang tatlo katao makaraang sumiklab ang labanan sa pagitan ng Moro Islamic Liberation Front (MILF) at mga armadong sekyu ng isang plantasyon ng saging sa Brgy. Tukanalugong, Datu Abdullah Sangki, Maguindanao kamakalawa.
Sinabi ni Maguindanao Police Director, P/Col. Ronald Briones na nagkasagupa ang grupo nina Kumander Tommy at Adrex Cali sa plantasyon ng saging sa Barangay Tukanalugong alas-2:30 ng hapon.
Ang mga nasawi sa panig ng MILF ay kinilalang sina Datu Ila Mohammad at Toy Taha, habang sa panig ng mga guwardya ng plantasyon na pinamumunuan ni alias Kali ay hindi pa natutukoy.
Sugatan naman sa insidente ang isang Tanto Abdul, isang civilian security volunteer na dinala sa Isulan Provincial Hospital sa Isulan, Sultan Kudarat.
Personal na alitan sa pamilya dahil sa pinag-aagawang lupang sakahan ang umano’y dahilan ng bakbakan na tumagal ng mahigit isang oras kaya daan-daang sibilyan ang lumikas patungo sa mas ligtas na lugar. Humupa lamang ang engkwentro nang dumating ang mga pulis at sundalo habang patuloy ang mapayapang negosasyon ng mga lokal opisyal para resolbahin ang gulo ng dalawang grupo.
- Latest
