19-anyos pinasok, niratrat

ATIMONAN, Quezon, Philippines — Hindi na nagising mula sa kanyang mahimbing na pagkakatulog ang isang 19-anyos na lalaki makaraang pasukin sa loob ng kanyang bahay at pagbabarilin ng hindi pa nakikila­lang salarin, kamakalawa sa Purok Bitin, Brgy. Malinao Ilaya ng bayang ito.

Apat na bala ng kalibre 45 sa ibat ibang parte ng katawan ang tumapos sa buhay ng biktimang si Jerome Escosia, may live in partner at residente ng nasabing barangay.

Bandang alas-7:00 ng umaga ay nakarinig ng apat na sunud-sunod na putok ng baril mula sa kalapit na bahay ng biktima ang ina nito na si Cristina subalit ipinagkibit balikat lamang ito

Nang pumasok si Cristina sa loob ng kuwarto ng anak makalipas ang 10 minuto ay natuklasang nakabulagta na at naliligo sa sariling dugo ang huli.