Mas mababang flat rate sa NLEX ipinatupad

LUNGSOD NG MALOLOS, Philippines — Mas mababang dagdag singil sa flat rate open system ang ipinatupad sa North Luzon Expressway o NLEX kamakalawa.

Ayon kay NLEX Corporation Assistant Vice President for Corporate Communication Kit Ventura, 9 na pisong flat rate na lamang sa halip na 10 piso ang madaragdag sa toll fee sa open system para sa mga Class 1 vehicle o ordinaryong sasakyan na nagbibiyahe sa Balintawak, Karuhatan, Paso de Blas, Mindanao Avenue, lungsod ng Meycauayan at bayan ng Marilao.

Karagdagang 22 piso sa halip na 23 piso naman sa mga Class 2 tulad ng mga bus at maliliit na trak at 28 piso imbes na 29 piso sa Class 3 o yung malalaking trak.

Ang pagtaas ng singil ng NLEX, naaprubahan matapos ang pagbubukas ng elevated na 5.65 kilometro Harbor Link Segment 10 na bumabagtas sa mga lungsod ng Valenzuela, Malabon at Caloocan.