SUV salpok sa mall: 1 patay, 12 sugatan
CAVITE, Philippines — Isa ang kumpirmadong patay habang 12 pa ang sugatan at kasalukuyang mga inoobserbahan sa pagamutan kabilang ang ilang mga bata at ang suspek matapos na araruhin ng isang Montero ang Walter Mart at natumbok nito ang mismong fun games ng Mall kung saan maraming bata ang naglalaro, kamakalawa ng hapon sa Waltermart, Carmona, Cavite.
Nakilala ng pulisya ang nasawing biktima na si Rollen Sartiel, 22-anyos, may asawa, ama ng 3-anyos na binabantayan nito habang naglalaro sa fun games na kabilang sa nasugatan sa aksidente, kapwa residente ng Brgy. 3, Carmona, Cavite.
Inoobserbahan naman sa pagamutan ang 12 na nasugatan na sina Myrna Doctor; Nina Marie Morello, Glennis Gianan, Jinky Oborza, Rhalf Oborza, 4-anyos; Florabel Medina; Mark Anthony Gonzales, Mark Leo Ace Gonzales, 4-anyos; Jazz Lano, 6-anyos; Cian Laurora Sartiel, 3- anyos, anak ng namatay; Emma Hunsay, 74 anyos, at ang driver ng Montero na si Rosendo Mamucod, 66, ng B6L 32 Villa Sorteo, Brgy. Milagrosa, Carmona, Cavite.
Sa ulat ni PO3 Marlon Ramirez, ala-1:25 ng hapon habang naka-park sa PWD parking area ng Waltermart ang Mitsubishi Montero (UHO229) at nasa driver seat ang driver nito nang bigla na lamang umusad ang sasakyan na hindi nito naagapan kung kaya dire-diretso ito sa loob ng mall hanggang sa matumbok nito ang Fun House kung nasaan abala ang mga biktima.
Naipit sa ilalim ng sasakyan ang ibang biktima kasama ang namatay habang ang iba ay tumilapon pagkasalpok ng sasakyan.
- Latest
