Shabu isiniksik sa regalo sa V-Day, nasamsam
CAVITE , Philippines — Tinatayang nasa P.5-milyong halaga ng shabu kabilang ang isiniksik sa bouquet ng bulaklak na regalo sa Valentine’s Day ang nakumpiska ng Bacoor City Police sa tatlong oras na magkakasunod na operasyon sa apat na barangay sa lungsod kamakalawa ng gabi.
Sa ulat ng pulisya, alas-5:00 ng hapon nang simulan ng pulisya ang drug-bust operation sa Brgy Molino 3, Green Valley Subd. kung saan nadakma ang mag-dyowang suspek na sina Jayson Jordan Dela Cruz, 27, at Mary Isabelle Gahisan, 22, ng San Fernando St., Delpan Tondo, Manila.
Nakumpiska sa babaeng suspek ang 0.82 gramo na shabu na isiniksik pa sa isang flower bouquet galing kay Dela Cruz. Habang nakuhanan din sila ng may 2.18 gramong shabu na P82,824 ang halaga.
Alas-5:40 ng hapon nang ilatag din ang drug ops sa Brgy. Niog 1 at nadakip dito si Silongan Kumpenag alyas Elong, 36. Halagang P54,000 na shabu ang binili ng tumayong buyer. Nasamsam dito ang 50 gramong shabu na nasa ?340,000.
Naaresto rin alas-6:30 ng gabi sa Brgy. San Nicolas 3 si Mark Angelo Villamor alias Macky, nasa drug watchlist, 32. Nakumpiska rito ang may 2.57 gramo ng shabu na ?17,476 ang halaga.
Sa Brgy. Habay 1, nadakma pa ang mga suspek na sina Michael Espiritu alias Mike, 31, at Achie Resurecion, 38, dakong alas-8:30 ng gabi matapos makumpiskahan ng 6 gramong shabu na nasa ?40K ang halaga.
- Latest