Minero pinasabog ang bungo ni kuya

LEGAZPI CITY, Albay  , Philippines  —  Sabog ang ulo ng isang 31-anyos na minero matapos barilin sa ulo ng nakatatandang kapatid makaraang magtalo sa kanilang bahay sa Brgy. Malubi, Aroroy, Masbate kamakalawa ng hapon.

Dead-on-the-spot dahil sa tama ng punglo sa ulo ang biktimang si Leo Mingoy Torres, ng nasabing barangay habang agad na naaresto at sinampahan ng kasong parricide ng mga pulis ang suspek na si Oriel Mingoy Torres, 38-anyos; kapwa minero ng Brgy. Cabangcalan.

Sa ulat, dakong alas-2:30 ng hapon, nakita ng ilang saksi na sinugod ni Oriel ang nakababatang kapatid sa bahay nito at kinompronta sa hindi tama umanong hatian ng kanilang kinita sa pagmimina. Gayunman, sa gitna ng kanilang pagtatalo, biglang bumunot ng hindi malamang kalibre ng baril ang nakatatandang Torres at malapitang pinutukan sa ulo ang kapatid na agad bumulagta. Matapos ang pamamaril, tumakas ang kuya pero agad na naaresto ng mga rumespondeng pulis.