Narco-colonel utas sa drug bust!
Nasa Ninja cops list ni Digong
MANILA, Philippines — Patay ang isang police colonel na sinasabing “Ninja cop” at nasa narco-list ni Pangulong Rodrigo Duterte matapos umanong kumasa sa kanyang mga kabaro sa PNP–Counter Intelligence Task Force (CITF) na nagsagawa ng drug bust operation sa Dipolog City, Zamboanga del Norte noong Lunes ng gabi.
Sa ulat ni PNP-CITF Commander P/Sr. Supt. Romeo Caramat Jr., kinilala ang napatay na si P/Supt. Santiago Rapiz, logistic officer ng Zamboanga del Norte Provincial Police Office (PPO) na idineklarang dead-on-arrival sa Corazon Aquino Hospital sa Dipolog City.
Sa imbestigasyon, alas-7:40 ng gabi nang ikasa ng PNP-CITF sa pakikipagkoordinasyon sa PDEA at Police Regional Office (PRO) 9 ang buy-bust operation laban kay Rapiz sa harapan ng Andres Bonifacio College gymnasium sa lungsod. Habang inaabot kay Rapiz ng posuer buyer ang P50,000 marked money kapalit ng droga ay nakahalata ang opisyal na undercover agent ang kanyang katransaksyon. Dahil dito, nagtatakbo siya at nagtangkang tumakas pero nakorner ng mga pulis. Sa halip na sumuko, bumunot ng baril ang opisyal at pinaputukan pa ang mga operatiba na nagbunsod sa shootout na tumagal ng ilang minuto na kanyang ikinabulagta.
Ayon kay Caramat, isinagawa ng operasyon laban kay Rapiz matapos na mapasama ang pangalan nito sa listahan ng mga Ninja cops ni Pangulong Duterte. Nasamsam sa operasyon ang isang malaking transparent sachet ng hinihinalang shabu na nasa P50,000 ang halaga at cal. 45 pistol ng nasabing parak.
Kaugnay nito, inihayag ni Chief Supt. Emmanuel Luis Licup, regional director ng Police Regional Office (PRO) 9 na lehitimo ang isinagawang operasyon ng PNP-CITF at PDEA na may kaukulang koordinasyon sa kanilang himpilan.
- Latest