Army Lt. dedo sa encounter, 1 pa sugatan
MANILA, Philippines — Nagbuwis ng buhay ang isang Army Lieutenant habang isa pang sundalo ang nasugatan makaraang makasagupa ng tropa ng militar ang grupo ng mga rebeldeng New People’s Army (NPA) sa liblib na lugar sa Brgy. Mainit, Bato, Camarines Sur, kamakalawa ng hapon.
Kinilala ang nasawing opisyal na si 2nd Lt. Jason Frederick Pasco, team leader ng Bravo Company ng Army’s 83rd Infantry Battalion (IB) samantalang isinugod sa Santa Maria Josefa Hospital Foundation sa Iriga City ang sugatang si Pfc. Reynaldo Aquino upang malapatan ng lunas.
Sa inisyal na ulat ng 9th Infantry Division (ID) ng Phl Army, habang nagsasagawa ng combat operation ang Bravo Company na pinamumunuan ni Pasco sa Brgy. Mainit, Bato dakong alas-5:15 ng hapon nang masabat ang isang pulutong ng mga rebeldeng NPA.
Dahil dito, agad na nagkaroon ng mainitang bakbakan sa pagitan ng magkabilang panig kung saan sa kasagsagan ng putukan ay nasapol ng bala si Pasco. Ang palitan ng putok ay tumagal ng ilang minuto at pinaniniwalaang may mga sugatan din sa panig ng mga rebelde base sa mga bakas ng dugo na nakita sa lugar na kanilang dinaanan sa pagtakas.
- Latest
