Kagawad niratrat sa basketball court

LEGAZPI CITY, Albay  , Philippines  —  Bumulagta ang isang 42-anyos na konsehal ng barangay o kagawad matapos na pagbabarilin ng tatlong ‘di nakilalang gunmen habang nanonood ng liga sa basketball court ng  Brgy. Lajong sa bayan ng Juban, Sorsogon noong Biyernes ng gabi.Dead-on-the-spot makaraang mapuruhan ng punglo sa iba’t-ibang bahagi ng katawan ang biktimang si Kagawad Emmelio Escandor Guab, 42, residente ng nasabing lugar. Sa ulat, dakong alas-8 ng gabi, habang nanonood ng basketball tournament sa basketball court ng barangay nang lapitan ng mga suspek at bigla na lang siyang pinagbabaril.

Dahil dito, nagsigawan ang mga tao at nagkanya-kanyan silang takbo dahil sa sunod-sunod na putok lalo nang makitang duguang tumimbuwang ang biktima. Agad tumakas ang mga suspek sa hindi malamang direksyon. Iniimbestigahan pa ng pulisya ang motibo sa pamamaslang.